Khazih sungah kongit pawlpi mite le Agape Digest laihawm a sim mimal kim tungah Kumthak thupha ci-in kong hopih masa hi. Mimal kim tung le innkuan kim tungah Topa kiangpan hong pai nopna thupha om ta hen. Amen

2023 sungah Topa in hong zawh pihna hangin Topa tung lungdam I ko hi. 2024 Kum sungah zong Topa in ama maipha tawh hong tuamin hong makaih ding cih lamen I hih manin I lung a muang mahmah hi.

Agape Digest laihawm zong Topa makaihna tawh maban kizomin hawmkhia zo suaksuak I hih manin Topa tungah I lung a dam mahmah hi. Hih agapedigest sungah a ki-at thute manpha-in, I mimal a ding le pawlpi a dingin khantohna hong pia ding cih zong um ka hih manin mimal in I sim tangtang ding zong kihantawn phapha hihang. Hih Agape Digest tawh kisai hong sepsak khempuehte tungah lungdamna ko phapha hang.

A tawpna ka gen nop ah, Laisim mite khangto hi. Laisim mite gual zo hi. Laisim mite mipil suak hi. Laisim mite kuamah in simmawh ngam lo hi. Laisim mite kuamah in neu-et ngei lo hi. Laisim hanciam tek ni. Lungdam.

Khazih sungah,
Rev. Gin Lam Kap ( Sia Thangneu)
Church Pastor,
ZAC, Bowling Green, KY USA